Ardit Çylybyli u ka bërë thirrje studentëve, të rinjve, prindërve dhe qytetarëve të Shkodrës që të marrin pjesë në protestën e paralajmëruar për të shtunën, më 17 tetor, në Tiranë.
Përmes një statusi në rrjetet sociale, Çylybyli u bën apel shkodranëve që t’u bashkohen studentëve në kërkesat e tyre për arsim cilësor, mundësi të barabarta dhe një të ardhme më të mirë në Shqipëri.
Ai rendit si arsye për pjesëmarrje edhe kërkesat për drejtësi, llogaridhënie dhe luftën kundër korrupsionit, duke theksuar nevojën për institucione që u shërbejnë qytetarëve.
Çylybyli kërkon gjithashtu përgjegjësi nga qeveria Rama dhe ndryshim politik, ndërsa nënvizon se zëri i qytetarëve duhet të dëgjohet dhe të respektohet.
“Shkodra nuk duhet të mungojë!”, shkruan ai në thirrjen drejtuar qytetarëve, duke bërë apel për pjesëmarrje paqësore, me dinjitet dhe vendosmëri.
Në përfundim, Çylybyli e mbyll mesazhin me sloganin: “Bashkë për drejtësi, dinjitet dhe ndryshim!”
