Një studim europian i publikuar së fundmi vë në dukje rritjen e kërcënimit nga përmbytjet, duke theksuar jo vetëm ndikimin e reshjeve intensive, por edhe rolin e zhvillimit urban, ndërtimit dhe infrastrukturës së brishtë.
Hulumtimi, i kryer nga profesorët Anastasios Stamou dhe Michalis Diakakis, shqyrtoi të dhënat e përmbytjeve dhe fatkeqësive në vende të ndryshme të Europës në periudhën 2007-2025. Në fokus u vendos edhe Greqia, përfshirë përmbytjet e shkaktuara nga stuhia Daniel.
Në përfundimet e tyre, studiuesit vlerësojnë se përmasat e dëmeve nga përmbytjet varen edhe nga planifikimi urban dhe ndërtimet. Shtimi i objekteve në ose pranë zonave të rrezikut, infrastruktura e mangët dhe rrjetet e pamjaftueshme të kullimit nxisin pasoja më të rënda.
Raporti adreson gjithashtu mangësitë në sistemet e paralajmërimit të hershëm. Në disa situata, alarmet nuk i arrijnë qytetarët në kohën e duhur ose nuk interpretohen siç duhet, çka ndikon në përshkallëzimin e rrezikut për njerëzit dhe pronën.
Autorët e studimit vënë theksin te nevoja për rishikimin e rregullave të ndërtimit dhe rikthimin e planifikimit urban. Ata rekomandojnë të ndërthuren masa mbrojtëse, sisteme efektive alarmimi si edhe përgatitje më të mirë institucionale.
Në dritën e ndryshimeve klimatike dhe ngjarjeve ekstreme që priten të shtohen, studiuesit theksojnë se menaxhimi i rrezikut kërkon planifikim të kujdesshëm dhe shmangie të ndërtimeve në terrene të ekspozuara ndaj përmbytjeve.
