Kryetari i Komunës së Tuzit, Lindon Gjelaj, ka uruar qytetarët me rastin e Ditës së Evropës, duke theksuar rëndësinë e vlerave evropiane, bashkëjetesës dhe zhvillimit të rajonit.
Përmes një postimi në rrjetet sociale, Gjelaj është shprehur se Komuna e Tuzit ka qenë gjithmonë bartëse e vlerave evropiane dhe një urë lidhëse mes kulturave. Në fotografinë e publikuar, në sfond shfaqet monumenti i heroit kombëtar Gjergj Kastrioti Skënderbeu, ndërsa pranë tij ndodhet ambasadori i Bashkimit Evropian, Johann Sattler.
Në mesazhin e tij, kreu i Tuzit nënvizon se rruga drejt Evropës është një përcaktim për një shoqëri më të drejtë, më të zhvilluar dhe me më shumë mundësi për qytetarët.
“Vazhdojmë së bashku të ndërtojmë Malësinë evropiane, duke ruajtur identitetin tonë, vlerat tona dhe frymën e bashkëjetesës që na ka karakterizuar gjithmonë”, shkruan Gjelaj në urimin e tij për 9 Majin – Ditën e Evropës.
