Mbrëmjen e së hënës, një 32-vjeçare ndërroi jetë në Jalë, Himarë, pasi iu përkeqësua gjendja shëndetësore gjatë qëndrimit në një hotel.
Policia njoftoi se rreth orës 18:40, shtetasja 32 vjeçe, e lindur në Londër, Mbretëria e Bashkuar, e cila ishte vendosur në një hotel në Jalë, kërkoi ndihmë pranë recepsionit pasi u ndje keq.
Punonjësit e hotelit e dërguan menjëherë në Qendrën Shëndetësore lokale, por, pavarësisht ndërhyrjes së mjekëve, ajo humbi jetën.
Verifikimet fillestare sugjerojnë se vdekja mund të ketë ardhur për shkaqe natyrale. Mjekët thanë se 32-vjeçarja vuante nga probleme me frymëmarrjen dhe kishte gjithashtu diabet.
Nën drejtimin e Prokurorisë, grupi hetimor po vazhdon veprimet për të sqaruar plotësisht shkaqet e vdekjes.
