Një produkt djathi “Brie”, i importuar nga Italia, është konstatuar i kontaminuar me bakterin “Listeria monocytogenes”, duke ngritur shqetësime për sigurinë ushqimore.
Sipas të dhënave zyrtare, produkti ka hyrë në Shqipëri më 16 korrik 2026 përmes kompanisë “INITALY RISTO & GUSTO” dhe më pas është shpërndarë në 44 hotele dhe restorante në gjashtë qarqe të vendit.
Mes subjekteve ku ka mbërritur produkti rezultojnë edhe tre lokale në Shkodër.
Emrat e tyre nuk janë bërë publikë, pasi produkti është tërhequr tashmë nga përdorimi. Sipas burimeve, këto biznese e kanë marrë djathin përmes importuesit dhe nuk kanë qenë në dijeni në momentin e furnizimit se produkti ishte i kontaminuar.
Rreziku lidhet me bakterin “Listeria monocytogenes”, i cili ka aftësinë të mbijetojë dhe të shumohet edhe në temperaturat e frigoriferit. Infeksioni mund të jetë veçanërisht i rrezikshëm për gratë shtatzëna, të moshuarit, foshnjat dhe personat me imunitet të dobësuar.
Sipas Organizatës Botërore të Shëndetësisë, djathërat e butë janë ndër ushqimet që mund të lidhen me listeriozën, ndërsa në format invazive të sëmundjes raportohet një shkallë vdekshmërie rreth 20–30%.
Autoritetet duhet të vijojnë procesin e gjurmimit dhe tërheqjes së të gjitha sasive të produktit të prekur, ndërsa konsumatorët këshillohen të mos konsumojnë produkte të identifikuara si të kontaminuara.
