Reforma e re territoriale ka sjellë përplasje mes mazhorancës dhe opozitës në Këshillin Bashkiak të Shkodrës.
Me 28 vota pro, nga këshilltarët e PS-së dhe PSD-së, Këshilli Bashkiak ka miratuar dhënien e pëlqimit për ndryshimet e propozuara në ndarjen territoriale. Kundër kanë votuar këshilltarët demokratë.
Vendimi është kundërshtuar ashpër nga opozita, e cila e ka cilësuar reformën si një nismë të Partisë Socialiste dhe votimin e saj në Këshillin e Shkodrës si të papranueshëm.
Gjatë mbledhjes, këshilltarja demokrate Gloria Shllaku ka kritikuar qëndrimin e Këshillit Bashkiak, duke theksuar se Shkodra është ndër bashkitë e para që po jep pëlqimin për ndryshimet e reja territoriale.
Shllaku e ka krahasuar këtë vendim me qëndrimin e bashkive të tjera, ku kundër reformës janë zhvilluar edhe protesta, ndërsa gjatë debatit nuk kanë munguar as akuzat dhe përplasjet mes palëve.
