Diskutimi për riorganizimin territorial të Bashkisë Shkodër ka sjellë edhe një përplasje mes dy këshilltarëve demokratë, Florian Bjankut dhe Fatmir Vojvodës.
Debati u zhvillua teksa në Këshillin Bashkiak po diskutohej propozimi për riorganizimin e zonës së Dukagjinit, e cila në kuadër të ndryshimeve të reja administrative parashikohet të marrë statusin e një “qyteti”, së bashku me Velipojën.
Gjatë diskutimit, Vojvoda iu drejtua Bjankut duke i kërkuar të tregonte kujdes në mënyrën se si shprehej për Dukagjinin.
“Kujdes kur flet për Dukagjinin, se Dukagjinin nuk e ul askush. Ka burra ai vend”, tha Vojvoda.
Përplasja mes dy këshilltarëve mësohet se erdhi si pasojë e një keqkuptimi gjatë debatit dhe nuk vijoi më tej.
Në përfundim të mbledhjes, Këshilli Bashkiak i Shkodrës votoi pro qëndrimit në favor të riorganizimit territorial të bashkisë, në kuadër të projektligjit për ndarjen e re administrative-territoriale.
