Prokuroria pranë Gjykatës së Shkallës së Parë të Juridiksionit të Përgjithshëm në Sarandë urdhëroi sekuestrimin e hotelit ‘Central Park Premium Hotel’, një ndërtim pesëkatësh pa leje në Ksamil, si dhe të një objekti tjetër ngjitur me një kat dhe sipërfaqe 52.2 metra katrorë, i ndërtuar po pa leje në të njëjtin lokalitet.
Për shtetasin K.P., autoritetet vendosën masën e sigurimit ‘Arrest në shtëpi’.
Këto veprime u morën në kuadër të hetimeve të Prokurorisë pranë Gjykatës së Shkallës së Parë të Juridiksionit të Përgjithshëm Sarandë lidhur me procedimin penal nr.522/2025, që ka në fokus veprat penale “Ndërtim i paligjshëm”, të parashikuar nga neni 199/a-4 i Kodit Penal, dhe “Shpërdorimi i detyrës” sipas nenit 248 të Kodit Penal.
Prokuroria ka theksuar se hetimet për identifikimin dhe përcaktimin e përgjegjësisë për të gjithë personat e përfshirë në këtë rast janë ende në vijim.
