Furnizimi me ujë të pijshëm vijon të jetë problem për banorët e disa zonave të Malësisë së Madhe, veçanërisht në kushtet e temperaturave të larta.
Përfaqësues të Partisë Socialdemokrate në Këshillin Bashkiak thonë se kanë marrë shqetësime nga banorët e Koplikut dhe Bajzës për ndërprerjet dhe mungesën e furnizimit me ujë.
Sipas PSD-së, një prej problematikave lidhet me ndërhyrjet dhe lidhjet e paligjshme në rrjetin e ujësjellësit, kryesisht në segmentin nga Moseli deri në Marshej. Sipas tyre, këto ndërhyrje ndikojnë në shpërndarjen e ujit dhe lënë një pjesë të banorëve pa furnizim të rregullt.
Për këtë situatë, kryetari i PSD-së në Malësi të Madhe, Ardian Hysa, i ka bërë thirrje Drejtorisë Rajonale të Ujësjellës-Kanalizimeve që të ndërhyjë dhe të marrë masa ndaj lidhjeve të paligjshme.
PSD kërkon që të garantohen shërbimet bazë për banorët dhe të merren masa konkrete për përmirësimin e furnizimit me ujë të pijshëm, veçanërisht gjatë ditëve me temperatura të larta.