Vetëm tri ditë pas plagosjes së një qytetari me armë zjarri në mes të ditës në lagjen “Partizani”, një tjetër ngjarje e rëndë ka tronditur Shkodrën. Në Dukagjin, një konflikt me armë përfundoi me vrasjen e babë e bir dhe plagosjen e rëndë të një personi tjetër.
Përmes një statusi në rrjetet sociale, deputeti Luciano Boci ngre shqetësimin për përkeqësimin e situatës së sigurisë në Shkodër, duke akuzuar qeverinë dhe Policinë e Shtetit për mungesë parandalimi.
Sipas Bocit, ngjarjet e fundit nuk duhen parë si episode të izoluara, ndërsa kërkon përgjigje për qarkullimin e armëve dhe masat që po merren për parandalimin e konflikteve.
Ai kritikon gjithashtu justifikimin e terrenit të vështirë në zonat malore, duke theksuar se Dukagjini është pjesë e Shqipërisë dhe se shteti duhet të garantojë sigurinë e qytetarëve.
Në fund, Boci kërkon përgjegjësi politike nga qeveria, duke e akuzuar atë se është e fortë ndaj qytetarëve dhe kundërshtarëve politikë, por e pafuqishme përballë krimit dhe armëve.
