Erling Haaland ka befasuar tifozët vetëm pak orë para paraqitjes së parë të Manchester Cityt në sezonin e ri të Premier League, duke u shfaqur me një stil të ri flokësh.
Sulmuesi norvegjez ka lënë pas pamjen që e karakterizonte me flokë të gjatë të lidhur dhe është rikthyer te një prerje më e shkurtër, e ngjashme me atë që mbante gjatë periudhës te Borussia Dortmund.
26-vjeçari ka ndarë në rrjetet sociale disa imazhe që dokumentojnë procesin e ndryshimit të pamjes së tij, të shoqëruara nga mbishkrimi: “New hair, don’t care”.
Gjatë një interviste të mbajtur në korrik, Haaland kishte zbuluar se stili i tij i mëparshëm i flokëve ishte rezultat i një këshille nga Zlatan Ibrahimovic. “Zlatan, e dini çfarë më tha? Mos i prit kurrë flokët, sepse forca është te flokët”, kishte rrëfyer norvegjezi.
Tani, Haaland do të prezantojë pamjen e tij të re edhe në fushën e lojës, në sfidën hapëse të Manchester Cityt në Premier League kundër Bournemouth.
Ndërkohë, sulmuesi i Cityt vjen pas një vere të suksesshme me Norvegjinë, në Kupën e Botës 2026, ku realizoi shtatë gola dhe kontribuoi në arritjen e ekipit në çerekfinale.
Performancat e tij gjatë këtij turneu jo vetëm që i shtuan ndjeshëm ndjekësit në rrjetet sociale, por e kanë shndërruar Haalandin në një nga personazhet më të përfolur të futbollit ndërkombëtar, edhe jashtë fushave të lojës.
