Problemet me furnizimin me ujë të pijshëm në Malësinë e Madhe kanë sjellë reagimin e kryebashkiakut Tonin Marinaj, i cili ka njoftuar nisjen e kontrolleve për identifikimin e lidhjeve të paligjshme dhe rasteve të shpërdorimit të ujit.
Në një takim të zhvilluar në Bashkinë Malësi e Madhe, drejtues të Shoqërisë Rajonale Ujësjellës-Kanalizime Shkodër, përfaqësues të institucioneve vendore dhe deputeti Bujar Rexha diskutuan situatën e furnizimit dhe masat që mund të ndërmerren për përmirësimin e saj.
Sipas Marinajt, vëmendje e veçantë iu kushtua edhe projekteve të parashikuara për zonat e Bajzës dhe Gruemirës.
Ndërkohë, Task-Forca e UKSH-së pritet të nisë kontrollet në terren, në bashkëpunim me Policinë Bashkiake dhe Policinë e Shtetit, për të evidentuar ndërhyrjet e paligjshme në rrjet dhe përdorimin abuziv të ujit të pijshëm.
Kryebashkiaku u ka bërë gjithashtu apel banorëve që të tregohen të kujdesshëm me konsumin e ujit, veçanërisht gjatë ditëve të nxehta, kur prurjet e burimeve ujore janë më të ulëta.
“Duhet të shmangim çdo formë shpërdorimi dhe të kursejmë ujin e pijshëm”, është apeli i Marinajt.
