Gjatë 48 orëve të fundit, katër vatra zjarri janë neutralizuar në zonat e Hasit dhe Tropojës, falë reagimit të shpejtë të shërbimit zjarrfikës, institucioneve përgjegjëse dhe angazhimit të komunitetit lokal.
Drejtoria e Emergjencave Civile bën me dije se në Has, zjarret shpërthyen në pyjet dhe kullotat e fshatit Perollaj, që ndodhet në Njësinë Administrative Golaj, si dhe në fshatin Cahan, pjesë e Njësisë Administrative Krumë.
Po ashtu, në Tropojë, flakët u përhapën në fshatin Dushaj, që i përket Njësisë Administrative Fierzë, dhe në zonën e Sopotit, në Njësinë Administrative Tropojë e Vjetër.
Terreni i thepisur dhe malor vështirësoi ndërhyrjen, por ekipet në vendngjarje arritën të kufizojnë përhapjen e zjarreve, duke parandaluar zhvillimin e tyre në përmasa më të mëdha.
Zjarret kanë përfshirë kryesisht shkurre dhe mbeturina, ndërkohë që sipërfaqet pyjore dhe bimësia kanë mbetur të paprekura nga dëme të raportuara.
Reagimi i shpejtë i strukturave të emergjencës ka qenë vendimtar për parandalimin e zgjerimit të zjarreve dhe ruajtjen e sigurisë në zonat përreth.
Duke pasur parasysh temperaturat e larta dhe rrezikun në rritje të zjarreve, Bashkitë Has dhe Tropojë u kërkojnë banorëve të tregojnë kujdes të shtuar dhe të shmangin çdo veprim që mund të sjellë ndezje të reja.
Ndërkohë, zjarrfikësit e Bashkisë Kukës janë bashkuar me ekipet ekzistuese që po punojnë për të përballuar vatrën e zjarrit në Lurë. Shërbimi Zjarrfikës ka organizuar transportin e ujit drejt zonave të prekura, duke ofruar mbështetje të rëndësishme në luftën me flakët në një terren të vështirë malor.
Gjithashtu, operacionit në Lurë i janë shtuar mjete dhe kapacitete të tjera, me synimin që ndërhyrja të jetë sa më efektive dhe të parandalohet përhapja e mëtejshme e zjarrit në territore të tjera.
