Me afrimin e sezonit më të nxehtë të vitit dhe rritjen e rrezikut nga zjarret, kryetari i Bashkisë Shkodër, Benet Beci, vizitoi Repartin e Mbrojtjes nga Zjarri dhe Shpëtimit. Gjatë kësaj vizite, ai vlerësoi dhe falënderoi efektivët për angazhimin e tyre të vazhdueshëm, veçanërisht në ditët e fundit të shënuara nga temperatura ekstreme.
Beci dorëzoi gjithashtu një automjet të ri për nevojat e Emergjencave Civile, një investim i dedikuar për të shtuar kapacitetet operacionale të repartit dhe për të përmirësuar reagimin ndaj situatave të rrezikshme. Ai siguroi trupën e zjarrfikësve se Bashkia Shkodër dhe Qeveria Shqiptare do të vazhdojnë të investojnë për të krijuar kushte më të mira pune dhe pajisje më bashkëkohore.
Gjatë takimit, kryebashkiaku u kërkoi efektivëve të mbajnë të lartë nivelin e gatishmërisë edhe në muajin gusht, duke e përshkruar këtë periudhë si ndër më të vështirat për shkak të rrezikut të lartë nga zjarret.
Vizita e tij u mbyll me shprehjen e mirënjohjes për sakrificën, profesionalizmin dhe përkushtimin e treguar nga zjarrfikësit, duke vënë në dukje rëndësinë jetike të punës së tyre për sigurinë e qytetarëve si dhe për mbrojtjen e pasurive publike dhe natyrore.
