Me foltoren e Kuvendit të bllokuar nga deputetët e opozitës dhe me zhurma të krijuara nga goditjet e tavolinave, kryetari i Kuvendit, Niko Peleshi, hapi procedurën e votimeve pas miratimit të kërkesës së kreut të grupit parlamentar të PS-së, Taulant Balla, për kalimin direkt në votim të çështjeve të rendit të ditës, për shkak të pamundësisë së zhvillimit të diskutimeve.
Opozita vijoi të mbante të bllokuar foltoren, ndërsa mazhoranca kaloi në votim disa prej pikave të rendit të ditës. Me votat e Partisë Socialiste u miratuan rezolutat për vlerësimin e veprimtarisë së institucioneve të pavarura, përfshirë SPAK-un, si dhe aktet normative për ndryshimet në buxhetin e vitit 2026 dhe financimin e pjesshëm të aktivitetit kulturor-turistik me përmasa ndërkombëtare, ku përfshihet edhe koncerti i reperit amerikan Kanye West.
Gjatë seancës, deputetët e opozitës vijuan protestën e tyre brenda sallës, ndërsa dëgjoheshin duke thirrur “dorëheqje” dhe “hajdut”.
Kryetari i Kuvendit, Niko Peleshi, përjashtoi nga seanca plenare kreun e grupit parlamentar të Partisë Demokratike, Gazment Bardhi, për shkak se hodhi ujë në drejtim të kryeministrit Edi Rama.
Rezultatet e disa prej votimeve:
Projektrezolutë “Për vlerësimin e veprimtarisë së Këshillit të Lartë Gjyqësor për vitin 2025” – 84 pro, 1 abstenim, 2 kundër.
Projektrezolutë “Për vlerësimin e veprimtarisë së Këshillit të Lartë të Prokurorisë për vitin 2025” – 83 pro, 1 abstenim, 3 kundër.
Projektrezolutë “Për vlerësimin e veprimtarisë së Kontrollit të Lartë të Shtetit për vitin 2025” – 82 pro, 1 abstenim, 0 kundër.
Projektrezolutë “Për vlerësimin e veprimtarisë së Prokurorisë së Përgjithshme për vitin 2025” – 83 pro, 1 abstenim, 0 kundër.
Projektrezolutë “Për vlerësimin e veprimtarisë së Strukturës së Posaçme Kundër Korrupsionit dhe Krimit të Organizuar për vitin 2025” – 83 pro, 1 abstenim, 1 kundër.
Projektrezolutë “Për vlerësimin e veprimtarisë së Avokatit të Popullit për vitin 2025” – 83 pro, 0 abstenim, 0 kundër.
Projektrezolutë “Për vlerësimin e veprimtarisë së Inspektorit të Lartë të Drejtësisë për vitin 2025” – 81 pro, 1 abstenim, 3 kundër.
Akt normativ nr. 2, datë 30.6.2026, “Për disa ndryshime dhe shtesa në ligjin nr. 87/2025, ‘Për buxhetin e vitit 2026’” – 82 pro, 0 abstenim, 3 kundër.
Akt normativ nr. 3, datë 6.7.2026, “Për financimin e pjesshëm të organizimit të një aktiviteti kulturor-turistik me përmasa ndërkombëtare” – 80 pro, 0 abstenim, 6 kundër.
Seanca vijoi nën tension, ndërsa opozita mbajti të bllokuar foltoren dhe mazhoranca vijoi me votimin e pikave të rendit të ditës.
