Një ngjarje e veçantë për dashamirësit e kinemasë do të zhvillohet në Shkodër, ku Kinema “Republika” do të sjellë në ekranin e madh filmin e shumëpritur “The Odyssey”, realizimin më të ri të regjisorit të njohur Christopher Nolan.
I konsideruar si një prej produksioneve më ambicioze të viteve të fundit, filmi pritet të tërheqë vëmendjen e publikut në mbarë botën, ndërsa shfaqja e tij në Shkodër shënon një moment të rëndësishëm për jetën artistike dhe kulturore të qytetit.
Organizatorët e konsiderojnë këtë premierë si një mundësi të veçantë për publikun shkodran, i cili do të ketë mundësinë të përjetojë në kinema një nga filmat më të diskutuar të momentit. Po ashtu, ata vlerësojnë faktin që Shqipëria dhe vlerat e saj vazhdojnë të frymëzojnë produksione me jehonë ndërkombëtare.
“The Odyssey” do të shfaqet çdo mbrëmje në Kinema “Republika”, në dy seanca, duke nisur nga ora 18:00 dhe 21:00.
Të gjithë artdashësit dhe adhuruesit e filmit janë të ftuar të bëhen pjesë e kësaj eksperience të veçantë dhe të shijojnë magjinë e ekranit të madh në shtëpinë e kinemasë në Shkodër.
