Në dy operacione të veçanta kërkim-shpëtimi, Policia Kufitare dhe Njësia Policore Detare kanë evakuar nëntë turistë të huaj gjatë ditës së sotme në Himarë dhe Ksamil.
Incidenti i parë u raportua në Himarë, ku një turist nga Spanja po përballonte vështirësi në det, në afërsi të Filikurit, pasi kajaku i tij u fundos. Pas njoftimit të bërë nga e fejuara e tij, shërbimet e Policisë Kufitare organizuan menjëherë një operacion shpëtimi, që rezultoi në lokalizimin e tij, nxjerrjen nga uji dhe transportimin në siguri pranë Pikës së Kontrollit Kufitar në Himarë.
Në Ksamil, rreth orës 12:45, Policia Kufitare u angazhua për të ndihmuar tetë turistë brazilianë, të gjithë pjesëtarë të së njëjtës familje, pasi skafi i tyre plastik rrezikonte të fundosej në zonën pas “Tre Ishujt”.
Duke përdorur një gomone dhe një jet ski, ekipi i shpëtimit arriti të evakuojë të gjithë turistët pa ndonjë incident, ndërsa mjeti lundrues u rimorkua në siguri drejt plazhit “Puerto Rico” në Ksamil.
Si rezultat i këtyre operacioneve, u arrit një sukses i plotë, pa ndodhur asnjë dëm për jetën ose shëndetin e turistëve, të cilët shprehën mirënjohjen e tyre për profesionalizmin dhe reagimin e shpejtë të Policisë Kufitare.
Policia Kufitare bën thirrje për respektimin e rregullave të lundrimit, përdorimin e pajisjeve mbrojtëse dhe shmangien e lundrimit në zona të rrezikshme, për të parandaluar incidente të ngjashme në të ardhmen.
