Shqiptarët e Filadelfias, në Shtetet e Bashkuara, u mblodhën për të protestuar, duke shprehur mbështetje për revoltën që ka zgjatur gati një muaj, e cila përfshin shqiptarët brenda dhe jashtë vendit.
Sidoqoftë, numri i pjesëmarrësve ende nuk ka arritur nivelin e pritur nga organizatorët. Megjithatë, atmosfera mbetej e fuqishme gjatë dy orëve të protestës, në sheshin e bashkisë, ku shekuj më parë janë hartuar dokumentet e pavarësisë, demokracisë dhe barazisë.
Me këtë të drejtë për protestë qytetare, pjesëmarrësit kërkuan dorëheqjen e kryeministrit Edi Rama dhe rrëzimin e kastës aktuale politike, me thirrjet “Rama në burg, Berisha në burg” që dominonin skenën në City Hall.
Protestës së shqiptarëve të Filadelfias i është bashkuar gjithashtu shoqata “Bijtë e Shqipes”, e cila, përmes një postimi në rrjetet sociale, shprehu mbështetje për të drejtën e protestuesve.
Dy protestat e para, të organizuara në mënyrë spontane, duket se po frymëzojnë edhe shqiptarët skeptikë ndaj dypartishmërisë absolute, duke i bërë ata të distancohen nga interesat ekonomike dhe sidomos politike që lidhen me dy partitë e vjetra.
