Kryeministri Edi Rama ka reaguar pas miratimit nga Parlamenti Europian të progresit të Shqipërisë në procesin e integrimit drejt Bashkimit Europian.
Përmes një postimi në rrjetet sociale, Rama thekson se PE ndau “shapin” e stuhisë digjitale të dizinformimit nga “sheqeri” i zonës së mbrojtur Vjosë – Nartë.
Sipas liderit të qeverisë, Vjosë-Narta do të mbrohet, ndërsa zhvillimi i Zvërnecit do të bazohet në një Vlerësim të Ndikimit në Mjedis, përputhje me standardet e Bashkimit Europian.
“Ja edhe PARLAMENTI EUROPIAN e ndau “shapin” e stuhisë digjitale të dizinformimit nga “sheqeri” i zonës së mbrojtur Vjosë – Nartë, e cila nuk ka asnjë lidhje me zhvillimin që europarlamentarët, të rrëzuar me votën e shumicës dërrmuese, e futën qorrazi si amendament në Rezolutën për Shqipërinë,” shprehet Rama.
Ai shton: “Tani, ose është çmendur dhe korruptuar krejt Europa, e cila përmes Parlamentit të saj e vlerëson lart Shqipërinë dhe nxit anëtarësimin tonë sa më parë në BE, ose ka diçka që nuk shkon me ata që e nisën protestën e javëve të fundit me mbrojtjen e flamengove dhe po e kthejnë atë në një luftë për pushtet në emër të flamengove!”
Në çdo rast, Rama thekson se flamengot do të mbrohen, se Vjosë-Narta do të mbrohet, dhe se Zvërneci do të zhvillohet sipas standardeve të Bashkimit Europian. “Ne do të vazhdojmë ta ngjisim Shqipërinë në majën ku ndodhet shtëpia e Europës së Bashkuar,” përfundon ai.
