Zëvendës presidenti i Parlamentit Europian, Nicolae Ștefănută, i cili gjithashtu ka rolin e eurodeputetit, ka shprehur shqetësim të thellë për aktet e dhunës policore me urdhër shtetëror të ndodhura sot në Tiranë ndaj protestuesve.
Duke publikuar pamje që dokumentojnë abuzimin nga ana e policisë ndaj qytetarëve që protestonin, ai thekson se “dhuna policore ndaj protestuesve është e papranueshme”.
Pak ditë më parë, eurodeputeti Ștefănută ndodhej në Tiranë dhe kishte marrë pjesë në protestën qytetare para ndërtesës së kryeministrisë.
Në një deklaratë për mediat, ai shpjegoi se kishte ardhur në Shqipëri për të vlerësuar situatën nga afër.
“Para së gjithash, jemi këtu për të mësuar faktet. Mendoj se të gjithë anëtarët e Parlamentit Europian, përfshirë mua si nënkryetar, duhet t’i njohim faktet.
Duhet të dëgjojmë çfarë thonë njerëzit dhe të kuptojmë se çfarë ndiejnë. Do të takohemi me organizata të shoqërisë civile, me institucione dhe do të vizitojmë vende të ndryshme.
Jemi këtu edhe për të mbështetur qytetarët, pasi ky flamur simbolizon bashkimin e popujve. E di që shqiptarët dëshirojnë me ngulm të bëhen pjesë e Bashkimit Europian.
Mendoj se ata e meritojnë anëtarësimin në BE, por meritojnë gjithashtu shtetin e së drejtës dhe drejtësinë, ashtu si në Europë,” është shprehur zëvendës presidenti i Parlamentit Europian, Nicolae Ștefănută.
