Situata e zjarreve në Malësi të Madhe ka sjellë një reagim të fortë nga nënkryetari i Bashkisë, Sytki Ndrecaj, i cili ngre akuza për zjarrvënie të qëllimshme dhe u bën thirrje qytetarëve të bashkëpunojnë me autoritetet.
Ndrecaj i ka cilësuar personat që, sipas tij, vendosin zjarre qëllimisht si “pjesa kriminale dhe e pamoralshme e shoqërisë”, duke theksuar se veprimet e tyre vënë në rrezik jetën e banorëve, pronat, mjedisin dhe vetë punonjësit e shërbimit zjarrfikës.
Në reagimin e tij, ai ka vlerësuar veçanërisht zjarrfikësit, duke i cilësuar “heronj të gjallë” dhe duke nënvizuar rrezikun me të cilin përballen gjatë ndërhyrjeve.
Ndrecaj ka kërkuar gjithashtu nga qytetarët që të mos heshtin në rast se kanë dijeni për persona që shkaktojnë zjarre, por të njoftojnë strukturat ligjzbatuese.
Në fund të reagimit, nënkryetari u bën apel qytetarëve të mbrojnë familjet, pronat dhe mjedisin, si dhe të bashkëpunojnë me zjarrfikësit, emergjencat civile, shërbimet pyjore, policinë dhe ushtrinë.
Apeli i tij është që çdo rast i dyshimtë të raportohet menjëherë pranë strukturave përkatëse.
“Zot bekoji dhe mbroji punonjësit zjarrfikës”, e mbyll reagimin Ndrecaj.
