Një kabinë e ujësjellësit në zonën e Ujit të Ftohtë, pranë tunelit të Vlorës, është përfshirë nga flakët këtë të martë.
Zjarri ka kapluar kabinën, e cila ka funksionin e shpërndarjes së ujit në këtë zonë. Dyshohet se vatra është ndezur fillimisht në pjesën kodrinore dhe më tej është përhapur në drejtim të objektit.
Në vendin e ngjarjes kanë ardhur shërbimet zjarrfikëse, të cilat vijojnë përpjekjet për të vënë situatën nën kontroll dhe për të shuar plotësisht flakët. Ekziston rreziku që zjarri të shtrihet edhe drejt zonave të banuara dhe godinave përreth.
Shkaku i rënies së zjarrit ende nuk është përcaktuar, ndërkohë që autoritetet mbeten të angazhuara në terren.
