Shtetet e Bashkuara të Amerikës kanë reaguar pas komenteve të presidentit të Serbisë, Aleksandar Vuçiç, lidhur me mundësinë e devijimit të lumit Ibër.
SHBA ka theksuar rëndësinë që ka normalizimi i marrëdhënieve mes Kosovës dhe Serbisë, duke vënë në pah se dialogu mbetet mënyra kryesore për zgjidhjen e të gjitha çështjeve të hapura ndërmjet dy shteteve.
Deklarata e Vuçiç, sipas së cilës Serbia po shqyrton ndryshimin e rrjedhës së Ibrit, ka nxitur reagime të ashpra në Kosovë dhe më gjerë në rajon.
Presidenti serb ka pohuar se kjo ide lidhet me zhvillimet në afërsi të Liqenit të Ujmanit, përfshirë edhe dëmtimin e disa objekteve të serbëve në atë territor.
Edhe Bashkimi Evropian është shprehur lidhur me deklaratat, duke theksuar se duhet shmangur çdo veprim apo deklaratë që mund të ndalojë procesin e normalizimit të marrëdhënieve mes Kosovës dhe Serbisë. BE ka ripërsëritur se progresi është i mundur vetëm përmes dialogut, sipas raportimit të Radio Evropa e Lirë.
Lumi Ibër ka një rol kyç strategjik për Kosovën, pasi është i lidhur me sistemin e Ujmanit, i cili siguron ujë të pijshëm, ujitje dhe është thelbësor për sektorin energjetik të vendit.
Ndërkohë, deklarimet e Vuçiç kanë ringjallur shqetësime për tensione të reja midis Prishtinës dhe Beogradit, si dhe për pasojat që mund të kenë në stabilitetin rajonal.
SHBA dhe BE mbeten të palëkundura në qëndrimin e tyre se normalizimi i marrëdhënieve ndërmjet Kosovës dhe Serbisë është i rëndësishëm për sigurinë dhe përparimin e të dy palëve në rrugën e integrimit evropian.
