Albion Nikolli, një nga ata që protestuan dhe u arrestuan të enjten para Kuvendit, është liruar këtë të shtunë pas disa ditësh në komisariat.
Në një deklaratë, Nikolli akuzoi efektivët e policisë se e dhunuan atë dhe protestues të tjerë gjatë arrestimit, si dhe në ambientet e policisë pas kësaj.
Sipas tij, incidenti filloi rreth orës 14:00, në momentin që ai po kërkonte informacion për një protestues të ndaluar.
“Shkuam në polici për të marrë informacion për një protestues të arrestuar. Na thanë se nuk kishin informacion dhe të largoheshim. Kur po iknim, patëm urdhërin ‘Kapeni këtë!’ dhe disa prej nesh u arrestuan. Arrestimi ishte i dhunshëm. Na goditën, ndonëse nuk bëmë asnjë rezistencë dhe i pyetëm përse po përdorej dhunë ndaj nesh,” tha Nikolli.
Nikolli gjithashtu theksoi se asnjë nga ata që u arrestuan nuk mori ndihmë mjekësore dhe nuk iu nënshtrua një ekspertize mjeko-ligjore, pavarësisht dëmtimeve që pretenduan se kishin.
“Nuk kemi marrë ndihmë mjekësore dhe nuk na është bërë ekspertizë. Kam shenja në trup nga dhuna, jo vetëm unë,” u shpreh ai.
