Presidenti amerikan, Donald Trump, ka shprehur kritika të ashpra ndaj NATO-s gjatë vizitës së tij në Ankara për samitin e Aleancës, ndërsa ka shfaqur optimizëm se konflikti në Ukrainë mund të vijë në një përfundim të shpejtë.
Në një konferencë për mediat, Trump u shpreh se ishte “shumë i zhgënjyer” me aleancën, duke akuzuar partnerët për mungesë mbështetjeje ndaj Shteteve të Bashkuara pas veprimeve të saj kundër Iranit.
“Do ta shohim. Isha shumë i zhgënjyer me NATO-n. Sincerisht, nëse ky samit nuk do të ishte organizuar në Turqi, ku kam një mik, një udhëheqës shumë të fortë, ndoshta nuk do të kisha marrë pjesë”, potencoi Trump, duke vlerësuar vendin dhe marrëdhënien me presidentin turk, Recep Tayyip Erdogan.
Ai theksoi se Shtetet e Bashkuara kanë investuar “triliona dollarë” për mbrojtjen e vendeve anëtare të NATO-s, por shprehu shqetësimin se nuk mori mbështetje të duhur nga aleatët.
“Kemi dhënë triliona dollarë për mbrojtjen e Evropës, Kanadasë dhe vendeve të tjera. Do të prisnit që ata të ishin të gatshëm për të na ndihmuar, por në fakt nuk u treguan të tillë”, tha ai.
Trump gjithashtu komentoi qëndrimin e ish-kryeministrit britanik, Keir Starmer, duke e quajtur deklaratën e tij se Mbretëria e Bashkuar do të asistonte vetëm pas përfundimit të luftës “të papëlqyer”.
“Nuk kishim nevojë për ndihmën e askujt. Në një farë mënyre po i vlerësova njerëzit për të parë nëse do të ishin aty apo jo”, shtoi ai.
Kur u pyet për situatën në Ukrainë, Trump njoftoi se kishte pasur një “bisedë shumë të mirë” me presidentin rus, Vladimir Putin, duke shfaqur besimin se konflikti mund të zgjidhet shpejt.
“Mendoj se do ta zgjidhim. Shpresoj që shumë shpejt të arrihet një zgjidhje”, u shpreh ai.
Trump pritet të takohet me presidentin ukrainas, Volodymyr Zelenskyy, të mërkurën, si pjesë e samitit të NATO-s në Ankara.
