Kompania kineze e teknologjisë GigaAI ka prezantuar robotin e parë humanoid komercial të projektuar për të kryer punët e shtëpisë, në një hap që po konsiderohet si revolucion në jetën e përditshme dhe automatizimin familjar.
Roboti, i quajtur SeeLight S1, është një makinë me dy krahë dhe rrota, e aftë të kryejë detyra të ndryshme shtëpiake si prerja e perimeve, skuqja e vezëve, mbushja e lavatriçes, varja e rrobave, shtrimi i shtratit dhe hapja e perdeve.
Sipas kompanisë, 100 njësitë e para pilot do të vendosen fillimisht në shtëpitë e punonjësve gjatë këtij muaji, ndërsa shpërndarja falas në qytetin Wuhan pritet të nisë në gjysmën e parë të vitit 2027.
Roboti do të dalë në treg në qershor të po atij viti me një çmim rreth 15 mijë dollarë.
SeeLight S1 funksionon me inteligjencë artificiale të integruar, duke i mundësuar të njohë ambientin përreth dhe të marrë vendime pa udhëzime të detajuara. Për arsye sigurie, roboti është pajisur me sensorë që ndalojnë menjëherë lëvizjet në rast kontakti me fëmijë ose kafshë shtëpiake.
Megjithatë, ekspertët paralajmërojnë se përdorimi i humanoidëve në ambiente shtëpiake mbetet një sfidë e madhe teknologjike.
Themeluesi i kompanisë së robotikës Zeroth, Guo Renjie, tha se shtëpitë janë mjedise të paparashikueshme dhe jo të standardizuara, gjë që e bën të vështirë funksionimin autonom të robotëve.
Ndërkohë, kompania OneRobotics po mbledh të dhëna nga shtëpi reale, qendra kujdesi dhe hapësira tregtare për të trajnuar robotët e saj humanoidë në situata të përditshme.
Sipas raportimeve të South China Morning Post, Kina po investon fuqishëm në inteligjencën artificiale dhe robotikën humanoide si pjesë e strategjisë për të përballuar krizën demografike dhe mungesën e fuqisë punëtore.
Ekspertët theksojnë se, përpara se humanoidët të bëhen pjesë e zakonshme e familjeve, industria duhet të garantojë standarde të larta sigurie dhe besueshmërie. Për këtë arsye, përdorimi fillestar i tyre pritet të fokusohet në ambiente të kontrolluara si depot dhe sektorët industrialë.
