Investimet në infrastrukturën sportive dhe krijimi i kushteve më të mira për zhvillimin e futbollit nga fëmijët dhe të rinjtë ishin në fokus të takimit mes kryetarit të Shoqatës Rajonale të Futbollit Shkodër, Armir Grima, dhe kryetarit të Bashkisë Vau-Dejës, Kristian Shkreli.
Gjatë bisedës u diskutua për nevojën e ndërtimit të fushave të reja sportive, si dhe për rikualifikimin e terreneve ekzistuese, me synimin për të përmirësuar kushtet e stërvitjes për ekipet e moshave dhe për të nxitur zhvillimin e futbollit në këtë bashki.
Një vëmendje e veçantë iu kushtua edhe bashkëpunimit mes Shoqatës Rajonale të Futbollit Shkodër dhe pushtetit vendor për të mbështetur klubet sportive dhe për të krijuar më shumë mundësi për fëmijët që dëshirojnë të merren me futboll.
Përmirësimi i infrastrukturës shihet si një element i rëndësishëm për përfshirjen e të rinjve në aktivitetet sportive dhe për zhvillimin e talenteve të reja. Në këtë drejtim, krijimi i hapësirave të përshtatshme për stërvitje mbetet një nevojë për futbollin në Vau-Dejës.
Takimi synoi evidentimin e mundësive për bashkëpunim institucional, me fokus përmirësimin e kushteve sportive dhe mbështetjen e brezave të rinj që zgjedhin futbollin.
