Kryetarja e Kuvendit, Elisa Spiropali, i është përgjigjur kryeministrit Edi Rama, pasi ky i fundit e ironizoi një ditë më parë gjatë diskutimeve brenda Partisë Socialiste.
Në një status të publikuar në rrjetet sociale, Spiropali ka mbështetur idenë e “Marrëveshjes së Re për Shqipërinë”, por njëkohësisht ka theksuar nevojën që PS të “vetëpastrohet”, të bëhet më demokratike, më dinamike dhe më meritokratike.
“Partisë Socialiste i duhet të gjejë forcat, të mbledhë mendjen, të vetëpastrohet, të bëhet më dinamike, më demokratike, më kompakte, për të mbetur gjithmonë e re, gjithmonë e pastër, pa smërçe, pa ndryshqe, pa pehlivanllëqe”, shkruan Spiropali.
Mesazhi vjen në një moment kur brenda socialistëve po vlojnë largimet dhe kjo deklaratë e Spiropalit po lexohet nga shumëkush si një reagim ndaj ironive që kryeministri artikuloi ndaj saj vetëm një ditë më parë.
Postimi i plotë:
Po, do ta kemi Marrëveshjen e Re për Shqipërinë.🇦🇱
Shqipërinë që duam të ndërtojmë duhet ta bëjmë, dhe do ta bëjmë, më të hapur, më të drejtë, më meritokratike, më europiane.
Për ta arritur këtë, Partisë Socialiste i duhet të gjejë forcat, të mbledhë mendjen, të vetpastrohet, të bëhet më dinamike, më demokratike, më kompakte, për të mbetur gjithmonë e re, gjithmonë e pastër, pa smërçe, pa ndryshqe, pa pehlivanllëqe.
Ta bëjmë Marëveshjen e Re të madhe, të thellë, të vërtetë, duke pasur parasysh, se po nuk lartësuam veten, nuk mund ta përmirësojmë vendin.
