Policia përdori gaz lotsjellës dhe u përlesh me protestuesit në qendër të Beogradit të shtunën, ndërsa dhjetëra mijëra qytetarë u mblodhën për të kërkuar zgjedhje të parakohshme dhe fundin e më shumë se një dekade sundimi të presidentit populist të Serbisë, Aleksandar Vuçiç.
Njerëzit mbushën Sheshin “Slavija”, një nga nyjet kryesore të kryeqytetit, në një shpërthim të ri protestash që nisën një vit e gjysmë më parë, kur shembja vdekjeprurëse e një çatie nxiti një lëvizje të udhëhequr nga të rinjtë kundër korrupsionit dhe keqmenaxhimit të pretenduar.
Forcat policore të pajisura për trazira rrethuan bashkinë e Beogradit, rreth një kilometër larg, përpara se të shpërthenin përleshje sporadike mes protestuesve dhe policisë pranë godinës së presidencës dhe jashtë një parku ku mbështetësit e Vuçiçit kanë ngritur kamp që nga marsi i vitit të kaluar.
Policia përdori gaz lotsjellës dhe granata shokuese ndërsa shtyu protestuesit më tej përgjatë rrugës. Protestuesit u vunë flakën koshave të mbushur me mbeturina.
Ministri i Brendshëm, Ivica Daçiç, tha se 23 persona janë ndaluar, raportoi agjencia e lajmeve Tanjug.
Daçiç deklaroi se disa efektivë policie mbetën të plagosur gjatë përleshjeve, por nuk dha detaje mbi shkallën e plagëve apo numrin e policëve të lënduar.
“Kam ardhur këtu për të treguar sa shumë jemi, sa qytetarë të pakënaqur ka dhe se ka ardhur koha të organizohen zgjedhje për t’i përmirësuar gjërat”, tha gjatë tubimit Dragan Gjuriç, një fermer 55-vjeçar nga qyteti i Shabacit, raporton Reuters.
