Gjatë vitit 2025, Shqipëria ka parë një rritje të numrit të azilkërkuesve, me flukset migratore që u përqendruan kryesisht në fundin e sezonit veror dhe në fillim të vjeshtës. Të dhënat e fundit nga Instituti i Statistikave (INSTAT) zbulojnë se vitin e kaluar u regjistruan 144 azilkërkues, duke shënuar një rritje prej 40 individësh krahasuar me vitin 2024.
Raporti tregon se shumica e kërkesave për azil ishin bërë nga shtetas të Egjiptit, të cilët përbënin 39,6% të totalit. Shtetasit afganë zinin vendin e dytë me 11,8%, ndërsa shtetasit palestinezë përfaqësuan 9,7% të aplikimeve të regjistruara gjatë vitit.
Analiza mujore e aplikimeve ilustron një tendencë të qartë sezonale. Muajt gusht, shtator dhe tetor së bashku përbënin 63,2% të të gjitha kërkesave për azil të regjistruara në Shqipëri gjatë vitit 2025, duke dëshmuar një intensifikim të flukseve migratore në këtë periudhë.
Përveç të dhënave për azilkërkuesit, raporti i INSTAT ofron gjithashtu një pasqyrë të lëvizjeve të shtetësisë shqiptare. Gjatë vitit 2025, 495 individë fituan shtetësinë shqiptare, ku 306 prej tyre e rifituan atë, ndërsa 189 e fituan për herë të parë. Gjithashtu, 173 persona dhanë dorëheqjen nga shtetësia shqiptare.
Sa i përket origjinës së atyre që fituan shtetësinë shqiptare, shumica prej tyre ishin nga Kosova, me 56,1% të totalit. Shtetasit nga Turqia pasonin me 20,1%, ndërsa Maqedonia e Veriut dhe Italia përfaqësonin secila 4,8% të rasteve.
Të dhënat gjithashtu tregojnë se grupmosha nga 30 deri në 39 vjeç ishte dominuese si në radhët e atyre që fituan shtetësinë shqiptare, ashtu edhe te ata që zgjodhën ta braktisnin atë. Konkretisht, kjo grupmoshë përfaqësoi 31,7% të përfituesve të shtetësisë dhe 43,9% të atyre që hoqën dorë prej saj.
Sipas metodologjisë së INSTAT, statistikat për azilkërkuesit dhe shtetësinë shqiptare bazohen në të dhënat e mbledhura nga autoritetet përkatëse të Ministrisë së Punëve të Brendshme. Për herë të parë në vitin 2025, u integrua një burim i ri të dhënash për statistikat e shtetësisë, me qëllim përmirësimin e cilësisë, plotësisë dhe harmonizimit të informacionit me standardet ndërkombëtare.
Rritja e numrit të azilkërkuesve, së bashku me trendet e fitimit dhe lënies së shtetësisë, pasqyron ndryshimet në lëvizjet migratore dhe zhvillimet demografike që po ndikojnë gjithnjë e më shumë në Shqipëri, në një kontekst rajonal dhe ndërkombëtar që është në vazhdimësi transformim.
Nga ekofin.al
