Studiuesi Pjetër Logoreci sjell një tjetër version të albumit fotografik që dokumenton një nga periudhat më të rëndësishme të historisë së Shkodrës.
Gjashtë vite pas botimit të parë, “Histori shkodrane në fotografi” rikthehet me një risi: fotografitë historike janë sjellë në ngjyra, duke u dhënë pamjeve të vjetra të qytetit një tjetër pamje dhe dimension.
Albumi i parë u publikua në vitin 2020, pas një pune kërkimore disa-vjeçare në arkivat e Austrisë. Fotot, kryesisht të periudhës 1908–1916, pasqyrojnë Shkodrën e asaj kohe, nga ndërtesat dhe rrugët e qytetit te personazhet, jeta e përditshme dhe zhvillimet historike.
Ribotimi synon ta bëjë këtë pasuri fotografike më të afërt me publikun e sotëm. Ngjyrat nxjerrin në pah elemente dhe detaje të cilat në versionin bardhezi mund të mos dallohen në të njëjtën mënyrë.
Një koleksion që shërben jo vetëm si dëshmi e së shkuarës, por edhe si një mënyrë për t’ua përcjellë historinë e Shkodrës brezave të rinj.
