Në një seancë të jashtëzakonshme të mbajtur së fundmi, Këshilli Bashkiak i Selenicës ka trajtuar si çështje kryesore projektin për bashkimin e Bashkisë Selenicë me Bashkinë Vlorë.
Kryetari i Bashkisë Selenicë, Nertil Bellaj, gjatë mbledhjes, ka shprehur hapur qëndrimin e tij kundërshtues ndaj kësaj nisme. Ai argumentoi se Selenica duhet të mbetet njësi administrative më vete dhe të mos humbasë autonominë.
Bellaj paralajmëroi se bashkimi me Bashkinë e Vlorës do të dobësonte përfaqësimin e komunitetit të Selenicës, duke ndikuar negativisht në zhvillimin lokal. Ai nënvizoi rëndësinë e identitetit, territorit dhe nevojave të veçanta të kësaj zone, të cilat, sipas tij, kërkojnë një administrim të pavarur.
Kryebashkiaku siguroi se do të vijojë të kundërshtojë projektin dhe të qëndrojë në mbrojtje të interesave të banorëve të Selenicës.
Kjo çështje pritet të mbetet në vëmendje edhe gjatë procesit të konsultimeve dhe diskutimeve të tjera me njësitë vendore që preken nga propozimi për riorganizim territorial.
