Të paktën shtatë persona kanë vdekur në Rusi pas një serie sulmesh masive me dron nga Ukraina, të cilat autoritetet ruse i kanë përshkruar si ndër sulmet më të mëdha të këtij viti.
Sipas njoftimeve nga zyrtarët rusë, gjatë natës janë përdorur rreth 822 dronë, nga të cilët afërsisht 600 ishin synuar të godisnin rajonin e Moskës. Guvernatori i Moskës e quajti ngjarjen “një nga sulmet më të mëdha me dronë në kujtesën e kohëve të fundit”.
Pesë viktima u raportuan në rajonin e Rostovit në jugperëndim të vendit, si pasojë e sulmeve të natës. Në Belgorod, afër kufirit me Ukrainën, një grua humbi jetën pasi një autobus civil u shënjestrua. Një tjetër viktimë, një burrë 83-vjeçar, u vra në një sulm të ndarë me dron në rajonin e Moskës.
Një nga caqet e goditura ishte një depo e kompanisë së shitjeve online Wildberries, e pozicionuar në Koledino, rreth 25 kilometra nga qendra e Moskës. Sipas kryebashkiakut të qytetit, Sergei Sobyanin, sulmi ndezi një zjarr të madh duke lënë të plagosur tre persona. Pamjet e shpërndara në rrjetet sociale tregojnë tym të dendur që ngrihet mbi zonën e depos.
Wildberries, një nga kompanitë më të mëdha të shitjeve online në Rusi, ka qenë më parë objektiv i sulmeve të ngjashme. Kievi i ka justifikuar këto sulme duke thënë se qëllimi ka qenë ndërprerja e qendrave logjistike që, sipas palës ukrainase, përdoren për të furnizuar ushtrinë ruse.
Ndërkohë, edhe sulmet ruse në territorin ukrainas kanë shkaktuar të paktën shtatë të vrarë dhe mbi 39 të plagosur. Rusia ka shtuar intensitetin e sulmeve me raketa dhe dronë kundër qyteteve të Ukrainës javët e fundit, ndërsa Ukraina ka rritur goditjet me dron ndaj caqeve brenda Rusisë.
Të dyja palët vazhdojnë të fajësojnë njëra-tjetrën për sulme ndaj civilëve, ndërsa lufta ajrore mes Moskës dhe Kievit po përshkallëzohet, me operacionet ushtarake që po zgjerojnë shtrirjen në thellësi të territoreve të kundërshtarëve.
