Një dron rus ka sulmuar një anije mallrash në pronësi turke në një nga kanalet e Deltës së Danubit, në territorin ukrainas pranë kufirit me Rumaninë.
Ngjarja ka përfshirë anijen M/V Mariam M, e cila kishte nisur udhëtimin nga Latakia në Siri dhe ishte në drejtim të portit të Galaçit në Rumani.
Autoritetet ukrainase njoftojnë se si pasojë e sulmit ka ndërruar jetë kapiteni i anijes, ndërsa tre pjesëtarë të ekuipazhit kanë mbetur të plagosur.
Ndërkohë, burime nga Turqia raportojnë një numër më të madh viktimash, duke bërë me dije se, përveç kapitenit, ka humbur jetën edhe piloti i portit dhe janë plagosur 13 persona të tjerë.
Si pasojë e goditjes nga droni, ura e komandimit e anijes është shkrumbuar plotësisht dhe flakët janë përhapur edhe në hapësirat e akomodimit.
Sulmi ka ndodhur në një rajon me rëndësi strategjike në Deltën e Danubit, afër kufirit me Rumaninë, zonë në të cilën prej fillimit të luftës janë regjistruar disa incidente që kanë kërcënuar sigurinë e trafikut detar dhe infrastrukturën portuale.
