Më shumë se 100 punime të realizuara nga nxënës të shkollave 9-vjeçare të Shkodrës janë bërë pjesë e ekspozitës “Atelieja e Edukimit”, e cila përmbledh krijimtarinë e fëmijëve përgjatë një dekade.
Punimet janë frymëzuar nga koleksioni fotografik i Fototekës Kombëtare “Marubi” dhe janë realizuar në kuadër të programeve edukative të muzeut. Përmes tyre, fëmijët kanë sjellë një këndvështrim të veçantë mbi fotografitë dhe historinë që ato mbartin, duke i shndërruar në pikënisje për krijime të reja.
Në ekspozitë gjenden punime të realizuara përmes teknikave dhe formave të ndryshme artistike, duke pasqyruar mënyrën se si nxënësit kanë interpretuar materialet e arkivit dhe janë afruar me fotografinë.
“Atelieja e Edukimit” tregon se njohja me fotografinë dhe trashëgiminë e arkivit Marubi mund të shkojë përtej mësimit të historisë. Për fëmijët, kjo përvojë është kthyer në një hapësirë ku ndërthuren kujtesa, imagjinata dhe shprehja krijuese.
