Rruga Kuç–Gur i Zi prej disa ditësh paraqitet me mbetje të pambledhura, sipas një denoncimi të bërë nga Mirsad Basha.
Në postimin e tij, Basha shprehet se kjo është një rrugë e frekuentuar çdo ditë nga qindra turistë që udhëtojnë drejt Komanit dhe Lumit të Shalës, por thekson se problematika prek mbi të gjitha banorët e zonës.
Sipas tij, temperaturat e larta dhe grumbullimi i mbeturinave krijojnë kushte të papërshtatshme higjienike dhe mund të kthehen në burim infeksionesh.
Basha i bën thirrje drejtuesve vendorë që të ndërhyjnë për pastrimin e zonës, duke kritikuar fokusin te projektet promovuese, ndërsa sipas tij problematikat bazë të qytetarëve mbeten të pazgjidhura.
“Shkodra nuk është vetëm Pedonalja”, shkruan ai në reagimin e tij.
