“Apple” është në pritje të rritjes së çmimeve për produktet e saj, përballë një rritje të konsiderueshme të kostove të çipave të memories, të cilët janë thelbësorë për funksionimin e pajisjeve inteligjente. Këtë informacion e ka konfirmuar Tim Cook, drejtori ekzekutiv në largim i kompanisë, i cili theksoi se rritja e çmimeve është “e pashmangshme” për shkak të paqëndrueshmërisë në tregun e këtyre komponentëve.
Megjithatë, Cook nuk ka saktësuar se kur do të fillojnë të ndikojnë çmimet e reja dhe as cilat produkte do të preken nga ky ndryshim. Është ende e paqartë nëse këto ndryshime do të kenë efekte edhe te modeli i ri i iPhone 18, i cili pritet të prezantohet në muajin shtator.
Çipat e memories luajnë një rol kyç në funksionimin e telefonave inteligjentë dhe pajisjeve të tjera elektronike. Sipas raportimeve, rritja e kërkesës për teknologjitë e inteligjencës artificiale ka ushtruar presion mbi furnizimin global, çka ka rezultuar në rritjen e çmimeve të tyre.
Në të njëjtën kohë, Presidenti i SHBA-së, Donald Trump, ka njoftuar se Apple ka rënë dakord të bashkëpunojë me prodhuesin e çipave Intel për prodhimin e çipave në territorin amerikan. Duke postuar në platformën Truth Social, ai shprehu se mbështetja për Intel është një hap në drejtim të forcimit të prodhimit vendas dhe zhvillimit të industrisë së çipave në Shtetet e Bashkuara.
Nëse planet e Apple realizohen, konsumatorët mund të përballen me çmime më të larta për disa nga produktet e kompanisë në muajt në vijim.
