Rreth 1400 nxënës të shkollave të mesme në Shkodër iu nënshtruan këtë të hënë provimit të fundit të Maturës Shtetërore, atij me zgjedhje, duke përmbyllur zyrtarisht sezonin e testimeve për vitin shkollor 2025-2026.
Drejtoresha e Zyrës Vendore të Arsimit në Shkodër, Brisela Kadija, bëri të ditur se i gjithë procesi është zhvilluar normalisht dhe me angazhim maksimal nga strukturat arsimore. Sipas saj, lëndët më të preferuara nga maturantët këtë vit kanë qenë ekonomia dhe psikologjia, të cilat kanë regjistruar numrin më të lartë të zgjedhjeve.
Ndërkohë, rezultatet e deritanishme të provimeve të gjuhës së huaj dhe gjuhës shqipe paraqiten mjaft pozitive. Sipas drejtuesve të arsimit, shkalla e kalueshmërisë ka arritur në 98 për qind, duke reflektuar nivelin e përgatitjes së maturantëve dhe punën e zhvilluar nga stafet pedagogjike.
Me përfundimin e provimit me zgjedhje, maturantët e Shkodrës i japin fund zyrtarisht Maturës Shtetërore për këtë vit.
