Debati për “Paketën e Maleve” është zhvendosur edhe në rrjetet sociale. Kryeministri Edi Rama publikoi një reagim të gjatë, ku me tone ironike u përgjigjet kritikave ndaj nismës së qeverisë, duke shkruar se ligji është “sipas ChatGPT, thjesht e qartë fare”.
Postimi i tij vjen pas deklaratave kritike të deputetes së pavarur Marjana Koçeku, e cila ka kundërshtuar publikisht këtë paketë ligjore. Në përgjigje, Koçeku publikoi një fotomontazh simbolik ku shfaqen dy vezë: njëra me portretin e Edi Ramës dhe tjetra me flamingon, simbol i protestave të qytetarëve. Në imazh, veza me flamingon paraqitet duke thyer vezën me figurën e kryeministrit, si një mesazh politik ndaj qëndrimit të tij.
Në reagimin e tij, Rama thekson se “Paketa e Maleve” nuk është hartuar për investitorë të mëdhenj, oligarkë apo shtetas të huaj, por për familjet që prej vitesh zotërojnë dhe punojnë toka në zonat malore pa mundur t’i formalizojnë ato. Sipas tij, nisma synon t’u japë këtyre familjeve mundësinë të zhvillojnë aktivitete si agroturizmi, bujtinat, fermat, punishte artizanale dhe forma të tjera të ekonomisë lokale.
Kryeministri argumenton se ligji nuk parashikon kalimin automatik të pronësisë, por vendos kushte të qarta, si verifikimi i posedimit, miratimi i projektit dhe përmbushja e detyrimeve kontraktore. Ai shton se në rast se këto kushte nuk plotësohen, prona mbetet në administrimin e shtetit.
Me këtë reagim, përplasja politike mbi “Paketën e Maleve” duket se po vazhdon jo vetëm në deklarata publike, por edhe përmes mesazheve simbolike në rrjetet sociale.
