Kryeministri Edi Rama ka komentuar edhe një herë protestën qytetare, e cila ka hyrë në ditën e 52-të, gjatë një bashkëbisedimi në rrjetet sociale.
Ai u ndal te “Paketa e Maleve”, duke e cilësuar atë si një nismë që, sipas tij, do të sjellë zhvillim për zonat malore dhe do të shndërrohet në një histori suksesi për vendin.
Rama tha se debatet dhe akuzat ndaj kësaj pakete vetëm sa krijojnë konfuzion, ndërsa theksoi se rezultatet do të flasin vetë përmes zhvillimit të ekonomisë në këto zona. Sipas tij, banorët që investojnë dhe punojnë në male meritojnë mbështetje, jo sulme dhe paragjykime.
Duke iu referuar protestës, kryeministri përdori sërish metaforën e “flamingove”, për të cilat tha se përfaqësojnë Shqipërinë e re dhe e kanë bërë të reflektojë. Në të kundërt, ai kritikoi ashpër kundërshtarët e tij politikë, duke i cilësuar si përfaqësues të së shkuarës që, sipas tij, nuk kanë vizion për të ardhmen e vendit.
Në përfundim, Rama ritheksoi bindjen se “Paketa e Maleve” do të sjellë përfitime afatgjata për Shqipërinë dhe se projekti do të dëshmojë suksesin e tij me kalimin e kohës.
