Qytetarët kanë filluar të mblidhen për të vazhduar protestën që zgjat prej 33 ditësh në kryeqytet. Aktivistë dhe përfaqësues të ndryshëm janë grumbulluar në sheshin “Skënderbej”.
Protestuesit pritet të vazhdojnë marshimin drejt godinës së Kryeministrisë, ku do të shprehin kërkesat e tyre, përpara se të zgjerojnë protestën nëpër rrugët e kryeqytetit.
Protesta ka filluar që në orën 09:00 dhe është shoqëruar me tensione, duke rezultuar në përplasje për rreth pesë orë para Kuvendit. Një numër i madh qytetarësh u bashkuan në mënyrë paqësore për të protestuar para Parlamentit.
Megjithatë, një provokim nga një deputet çoi në përshkallëzimin e situatës, duke u përplasur protestuesit me forcat e policisë. Protestuesit hodhën miell e vezë drejt efektivëve, të cilët iu përgjigjën me gaz lotsjellës.
Ndërsa qëndresa vazhdoi për disa orë, policia përdori gazin lotsjellës për të shpërndarë protestuesit, ndërsa autobotet me ujë e piper u aktivizuan gjithashtu për të kontrolluar situatën.
Tensionet para Kuvendit nuk ishin drejtuar vetëm ndaj mazhorancës, por preku edhe përfaqësues të opozitës. Në një moment tjetër të protestës, disa deputetë të Partisë Demokratike arritën në ambientet jashtme të Kuvendit. Pasi u panë nga turma, protestuesit e irrituar shpërthyen në thirrje, duke ndryshuar drejtimin e koret të tyre.
“Opozitë e shitur!”, ishin thirrjet që dëgjoheshin nga protestuesit drejt deputetëve demokratikë, duke e treguar se revolta qytetare tani është e orientuar ndaj të gjithë klasës politike tradicionale.
