Ish-drejtori i Policisë së Shkodrës, Gentian Berberi, është pezulluar nga detyra dhe ndaj tij është hapur procedurë disiplinore pas një incidenti të ndodhur në ambientet e Policisë së Shtetit.
Sipas informacioneve, situata është krijuar në momentin kur Berberit i është komunikuar nga strukturat përgjegjëse nisja e një procedure disiplinore. Gjatë këtij komunikimi, ai dyshohet se ka pasur një reagim të ashpër verbal ndaj përfaqësuesve të Drejtorisë së Personelit.
Burimet bëjnë me dije se tensioni është përshkallëzuar më tej, pasi Berberi dyshohet se ka përdorur deklarata fyese edhe ndaj drejtuesve të lartë të Policisë së Shtetit. Pas ngjarjes, institucionet përkatëse kanë vendosur pezullimin e tij nga funksioni deri në përfundim të procedurave disiplinore.
Gentian Berberi është një emër i njohur në radhët e policisë, pasi për disa vite ka drejtuar Policinë e Shkodrës. Ai u largua nga kjo detyrë në një periudhë kur në qark po zhvilloheshin hetime që lidhen me kultivimin e lëndëve narkotike dhe veprimtarinë e disa punonjësve të policisë. Më pas, Berberi u transferua në një funksion tjetër në Drejtorinë e Përgjithshme të Policisë së Shtetit.
Gjatë kohës që drejtoi Policinë e Shkodrës, ai është konsideruar nga kolegët si një drejtues me profil të qetë dhe me marrëdhënie korrekte me efektivët në terren. Megjithatë, incidenti i fundit ka sjellë reagimin e strukturave drejtuese dhe hapjen e një procesi disiplinor ndaj tij.
