Një aksident i rëndë rrugor ka ndodhur rreth mesditës së kësaj të diele në Rrugën e Kombit, në segmentin Milot–Rrëshen, pranë Rubikut.
Sipas të dhënave paraprake, në aksident janë përfshirë dy automjete, të cilat janë përplasur me njëra-tjetrën, duke lënë të plagosur dy persona. Pas sinjalizimit, në vendngjarje kanë mbërritur shërbimet e Policisë dhe ekipet e urgjencës, të cilat kanë ndërhyrë për dhënien e ndihmës së parë.
Të lënduarit janë transportuar fillimisht drejt Spitalit të Rrëshenit, ku kanë marrë trajtimin e parë mjekësor. Më pas, për shkak të gjendjes së tyre shëndetësore, janë dërguar në Spitalin Universitar të Traumës në Tiranë për mjekim më të specializuar.
Ndërkohë, policia ka nisur veprimet hetimore për të përcaktuar shkaqet dhe rrethanat e aksidentit, si dhe po punon për rikthimin e plotë të qarkullimit normal në këtë segment të Rrugës së Kombit.
