Drejtori i Përgjithshëm i Policisë së Shtetit, Skender Hita, ka zhvilluar një vizitë në banesën e nënkomisarit Fasli Rama, i cili mbeti i plagosur gjatë protestës së zhvilluar në Shkodër.
Gjatë takimit, Hita u njoh me gjendjen shëndetësore të efektivit, i cili ka shërbyer për më shumë se 30 vite në radhët e Policisë së Shtetit. Ai vlerësoi kontributin dhe karrierën e Ramës, duke i shprehur mirënjohjen për shërbimin e tij.
Sipas Policisë, prania e nënkomisarit në protestë kishte për qëllim garantimin e së drejtës për tubim paqësor dhe mbrojtjen e institucioneve, si dhe të pronës publike e private nga aktet e dhunës.
Nga ana e tij, Fasli Rama bëri me dije se shëndeti i tij është përmirësuar dhe se po shkon drejt rikuperimit të plotë. Ai falënderoi Hitën për vizitën dhe mbështetjen, si dhe mjekët e Spitalit të Traumës për kujdesin gjatë trajtimit.
Në fund, drejtori i Policisë së Shtetit i uroi efektivit shërim të shpejtë dhe rikthim sa më parë në detyrë.