Qeveria venezueliane deklaroi të martën se ka arritur një marrëveshje me Izraelin për krijimin e një mekanizmi të koordinuar, i cili do të lehtësojë ofrimin e shërbimeve konsullore, duke shënuar një kthesë të madhe pas ndërprerjes së marrëdhënieve diplomatike mes dy vendeve që prej vitit 2009.
Venezuela ndërpreu lidhjet me Izraelin 17 vjet më parë, në përgjigje të ofensivave ushtarake izraelite në Rripin e Gazës, dhe ka mbajtur tradicionalisht marrëdhënie të ngushta me Iranin. Megjithatë, kohët e fundit, marrëdhëniet me Shtetet e Bashkuara janë afruar, veçanërisht pasi SHBA-të ndaluan Presidentin Nicolas Maduro në janar.
“Raundet e bisedimeve në javët e fundit rezultuan në një marrëveshje për të krijuar një mekanizëm koordinimi që do të mundësojë ofrimin e shërbimeve konsullore për qytetarët e të dy vendeve”, njoftoi zyra e ministrit të Jashtëm izraelit, Gideon Sa’ar.
Zbutja e marrëdhënieve mes dy vendeve është përforcuar edhe pas ndihmës humanitare të dërguar nga Izraeli pas një tërmeti në Venezuelë. Një ekip ndihme izraelite mbërriti në vend për të ofruar ekspertizë në menaxhimin e emergjencave dhe për të mbështetur procesin e rimëkëmbjes.
