Një sulm i rëndë nga ujqërit ka shkaktuar dëme të mëdha ekonomike në fermën e Andrea Ndout, një prej fermerëve më të njohur të qarkut të Tropojës.
Ngjarja ndodhi pasditen e 15 korrikut, rreth orës 18:30, në vendin e quajtur “Livadhi i Madh” në Palç. Sipas të dhënave, menjëherë pas një shiu të rrëmbyeshëm, ndërsa djali dhe nipi i fermerit po grumbullonin tufën për ta kthyer në stan, një tufë ujqërish sulmoi bagëtitë, duke i shpërndarë në një territor të gjerë malor.
Nga 296 krerë bagëti, deri në mbrëmje u arrit të gjendeshin vetëm 130. Të nesërmen u organizua një operacion i gjerë kërkimi me pjesëmarrjen e banorëve të Palçit, Salçës dhe Lekbibajt, veterinerit të zonës, kryeplakut, inspektorëve dhe me ndihmën e një droni.
Bilanci paraprak është i rëndë: 33 bagëti u gjetën të ngordhura, mbi 50 të tjera të plagosura, ndërsa një numër i konsiderueshëm rezultojnë ende të zhdukura. Kërkimet vazhdojnë në bjeshkët përreth.
Për ngjarjen janë njoftuar Drejtoria e Bujqësisë, Bashkia Tropojë, Drejtoria e Zonave të Mbrojtura, Emergjencat Civile dhe shërbimi veterinar.
Veterineri i zonës, Valentin Ulndreaj, qëndroi gjatë gjithë ditës në terren, duke evidentuar dëmet dhe duke trajtuar me medikamente e qepje mbi 50 bagëti të plagosura.
Andrea Ndou, i cili mbarështon dele, dhi, lopë, derra, kuaj dhe shpendë, deklaron se humbja e rreth 124 krerëve përbën një goditje shumë të rëndë ekonomike për familjen dhe rrezikon vazhdimësinë e aktivitetit të fermës, e cila furnizon me produkte vendase bujtina dhe subjekte turistike deri në Valbonë.
Fermeri kërkon ndërhyrjen e Ministrisë së Bujqësisë, AZHBR-së dhe Emergjencave Civile për mbështetje financiare dhe dëmshpërblim, ndërsa apelon edhe për groposjen urgjente të kafshëve të ngordhura, të cilat përbëjnë rrezik sanitar në zonë.
Në përfundim, ai falënderon banorët dhe institucionet që u angazhuan në kërkimin e bagëtive dhe i qëndruan pranë familjes së tij në këto momente të vështira.
Burimi: News Power
