Kryeministri Edi Rama theksoi se shqiptarët tani kanë akses më të madh në transportin ajror, një zhvillim që ai e përshkruan si një tregues të rëndësishëm të përmirësimit të sektorit të aviacionit. Ai shpjegoi se kur administrata e tij filloi punën, vetëm 6.5 për qind e shqiptarëve ishin në gjendje të shfrytëzonin transportin ajror, ndërsa sot ky numër ka arritur deri në 40 për qind.
Rama lidhi këtë përmirësim me liberalizimin e tregut të fluturimeve, pas përfundimit të një koncesioni të mëparshëm, i cili sipas tij kishte rritur çmimet e udhëtimit në dhe nga Shqipëria.
Gjithashtu, ai evidentoi se rritja e të ardhurave të qytetarëve ka ndikuar pozitivisht në numrin e udhëtarëve që zgjedhin këtë lloj transporti.
“Kur ne filluam këtë detyrë, 6.5% e popullsisë kishte akses në aviacion. Ndërsa sot, ky përqindje ka arritur në afro 40%. Kjo është një pasojë e hapjes së konkurrencës pas përfundimit të koncesionit të mëparshëm, që e kishte bërë fluturimin nga Shqipëria shumë më të shtrenjtë. Po ashtu, rritja e të ardhurave të shqiptarëve është një fakt i pa diskutueshëm, që mbështetet nga të dhënat,” tha Rama.
Ai shprehu mirënjohje për të gjithë ata që kontribuan në këtë arritje, veçanërisht për ambasadoren e Kanadasë.
Megjithatë, ai shprehu pakënaqësi për përfaqësuesit e kompanisë fluturuese, duke thënë se ata ishin këtu për të fituar para dhe theksoi se sado më shumë të fitojnë, aq më shumë do të rritet numri i fluturimeve. “Nuk kam falënderim për ju, sepse nuk keni bërë ndonjë sakrificë,” tha Rama. “Megjithatë, falënderoj ambasadoren që e ka bërë këtë rrugë dhe të gjithë punonjësit e aeroportit, si dhe policët që shërbejnë këtu. Sot, aeroporti është një vend më i mirë, edhe pse ka ende të metat në komunikim. Disa vite më parë, udhëtarët hasnin në një situatë shumë më të keqe me autoritetet. Tani, kemi një polici që buzëqesh, diçka e paimagjinueshme deri para pak vitesh.”
