Ndahet nga jeta inxhinieri i njohur elektrik Myzafer Lesha, një prej figurave më të spikatura të sektorit energjetik në Shkodër dhe Shqipëri
Është ndarë nga jeta inxhinieri elektrik Myzafer Lesha, një emër i vlerësuar ndër vite për kontributin e tij të jashtëzakonshëm në zhvillimin dhe menaxhimin e infrastrukturës elektroenergjetike në Shqipëri.
Ing. Myzafer Lesha i përket brezit të profesionistëve që lanë gjurmë në sektorin e energjisë, me një karrierë të gjatë në institucionet më të rëndësishme të vendit, si KESH dhe OST. Ai u dallua për njohuritë e thelluara teknike, aftësitë menaxhuese dhe veçanërisht për rolin e tij në situata të vështira energjetike që përballoi vendi ndër vite.
Një nga periudhat më të rëndësishme të karrierës së tij ishte fillimi i viteve 2000, kur Shqipëria u përball me një krizë të rëndë hidrike dhe energjetike. Në atë kohë, si drejtues i HEC Vau i Dejës, ai menaxhoi një nga veprat më strategjike të kaskadës së Drinit, duke garantuar shfrytëzimin maksimal të kapaciteteve prodhuese pa cenuar sigurinë teknike të sistemit.
Po në këtë periudhë, si Drejtor i KESH Rajoni Shkodër, me përgjegjësi për Shkodrën, Malësinë e Madhe dhe Lezhën, ai udhëhoqi një ndërhyrje të rëndësishme inxhinierike që solli një ndryshim të madh për furnizimin me energji të veriut të vendit.
Nën drejtimin e tij u realizua shkëputja e rrjetit të zonës nga kufizimet e linjave të eksportit dhe lidhja direkte me rrjetin energjetik të Podgoricës në Mal të Zi, një zgjidhje që mundësoi importimin e menjëhershëm të energjisë dhe reduktoi ndjeshëm kufizimet e furnizimit me energji elektrike në veri.
Pas reformimit të sektorit energjetik, gjatë viteve 2008–2010, Ing. Lesha vijoi kontributin e tij pranë Operatorit të Sistemit të Transmetimit (OST), ku u angazhua në monitorimin e bilanceve teknike, mirëmbajtjen e pajisjeve të tensionit të lartë dhe garantimin e qëndrueshmërisë së linjave të transmetimit.
Me ndarjen e tij nga jeta, Shkodra dhe komuniteti i inxhinierëve humbin një profesionist të rrallë, një figurë që për dekada i shërbeu me përkushtim zhvillimit të sistemit energjetik shqiptar.
Kontributi i Ing. Myzafer Leshës mbetet pjesë e historisë teknike të energjisë në Shqipëri.
Burimi: Tv Shkoder
