NASA ka nisur një mision të jashtëzakonshëm për të mbrojtur observatorin hapësinor Swift, i cili është në rrezik të humbasë orbitën e tij dhe të futet në atmosferën e Tokës.
Për herë të parë, një anije robotike do të përpiqet të kapë teleskopin në hapësirë dhe ta ngrejë në një orbitë më të sigurt.
Misioni realizohet nga anija kozmike LINK, e krijuar nga kompania Katalyst Space Technologies. E pajisur me tre krahë robotikë, kamera dhe sisteme navigimi, LINK ka për qëllim të afrohet me Swift, ta kapë dhe më pas të ngrisë gradualisht nga rreth 360 kilometra lartësi në afërsisht 600 kilometra, ku ai operonte fillimisht.
Shkencëtarët e shohin këtë mision si një sfidë të madhe, pasi një operacion i tillë nuk është realizuar më parë. Sipas Dr. Simeon Barber, studiues në Universitetin e Hapur, Swift është një observator unik që i lejon astronomët të studiojnë shpërthimet e rrezeve gama dhe fenomene të tjera me energji ekstremisht të lartë, të cilat nuk mund të vëzhgohen me instrumente të tjera.
Observatori Swift u lançua në vitin 2004 për të studiuar shpërthimet më të fuqishme në Univers, të shkaktuara nga vdekja e yjeve gjigantë ose nga përplasja e objekteve të dendura kozmike. Gjatë dy dekadave të fundit, ai ka ofruar kontribute të rëndësishme në fushën e astronomisë, duke zbuluar ngjarje që zgjasin vetëm disa sekonda, por që çlirojnë energji të barabartë me atë që Dielli prodhon gjatë gjithë jetës së tij.
Rënia e gradualshme e Swift ka ardhur si pasojë e rritjes së aktivitetit diellor, i cili ka zgjeruar atmosferën e Tokës dhe ka rritur rezistencën ndaj lëvizjes së teleskopit. Si rezultat, orbita e tij ka rënë nga 600 në rreth 360 kilometra, kryesisht gjatë dy viteve të fundit. Ekspertët paralajmërojnë se nëse orbita zbritet nën 300 kilometra, shpëtimi i tij do të bëhet i pamundur.
Në javët që vijnë, LINK do të testojë të gjitha sistemet e saj përpara se t’i afrohet Swift. Pasi të arrijë pranë teleskopit, roboti do të fotografojë nga kënde të ndryshme për të përcaktuar pikën më të sigurt për kapjen, pasi observatori nuk është projektuar për operacione të tilla.
