Qyteti i Shkodrës mbeti pa furnizim me ujë të pijshëm për më shumë se 20 orë gjatë ditës së martë, si pasojë e ndërhyrjeve në rrjetin ujësjellës. Ndërprerja nisi në orët e para të mëngjesit, për shkak të punimeve për lidhjen e rrjetit të ri me stacionin kryesor të ujësjellësit në Dobraç.
Sipas njoftimit të Ndërmarrjes Ujësjellës-Kanalizime Shkodër, furnizimi ishte parashikuar të rikthehej rreth orës 17:00, por uji u rikthye vetëm pas mesnate. Situata krijoi vështirësi për banorët, veçanërisht në një periudhë me temperatura të larta dhe fluks të shtuar turistësh. Shumë qytetarë shprehën pakënaqësinë e tyre, duke vlerësuar se ndërhyrje të kësaj natyre duhej të ishin planifikuar jashtë sezonit veror.
Ndërkohë, faza e parë e punimeve është përmbyllur, ndërsa projekti do të vazhdojë me etapat e tjera deri në realizimin e plotë të investimit.
